जेव्हा काही महिन्यापुर्वी आयसिसने इराकमध्ये मांडलेल्या उच्छादाची परिसीमा गाठली गेली होती, तेव्हा जगभरात क्रूड ऑईलचे भाव भडकले होते. आपल्या देशात पेट्रोल-डिझेलचा वापर ट्रान्सपोर्टमध्ये भरपूर होत असल्याने आपल्याकडे ऑईलसकट भाजीपाला, धान्यांपासून दैनंदिन वापरातील अनेक महत्वाच्या वस्तूंचे भाव गगनाला जाऊन भिडले होते. त्याच्यावर देशात काही काळापुरती बोंबाबोंबही झाली. तेव्हा पंपंनी इराक-सिरियाकडे बोट दाखवून आपले हात वर केले होते, ते खरंही होतं. कारण भारताचा ऑईल मार्केटवर पुरेसा प्रभाव नाही. तिकडे परिस्थिती चिघळली की आपल्याला नाक मुठीत धरुन आहे त्या किंमतीत ऑईल खरेदी करावे लागते.
आता मोदींना १०० दिवसांत काय केलं असं सतत विचारलं जात असताना मोदींनी सांगितलं की, मी क्रुड ऑईलचे भाव खाली उतरवून दाखवले!!! हे हास्यास्पद विधान भलतंच सिरीयसली घेऊन सभांमध्ये मोदी-मोदी चा जयघोष नेहमीप्रमाणे भक्तांनी केलाच. ह्यात लोकांना इतकं साधं कसं कळत नाही की मोदी जर किंमतीतली वाढ कंट्रोल करु शकत नाहीत, तर किंमतीतली घट त्यांनी कशी घडवून आणली? आता जगभरात क्रूड ऑईलच्या किंमती उतरत आहेत, याची प्रमुख कारणं पुढीलप्रमाणे,
१)इराण आणि लिबियातून मार्केटमध्ये क्रूड ऑईलची वाढलेली आवक
२)युरोपियन इकॉनॉमीत सुधारणा होण्याची सध्यातरी शक्यता नाही. थोडक्यात तिथून मागणी वाढण्याची शक्यता कमी
३)अमेरिका,रशिया आणि चायनाच्या मागणीत घट
४)या सगळ्या कारणांमुळे मार्केटमध्ये ऑईलचा पुरवठा जास्त आणि मागणी कमी झालीये. म्हणून इराण आणि सौदी अरेबिया या दोन प्रमुख उत्पादक देशांमध्ये डिस्काउंट वॉर सुरु झालं आहे.
या सगळ्या कारणांमुळे जगभरात ऑइलचे भाव वेगाने खाली उतरत आहेत, यात मोदींचा दुरान्वयेही संबंध नाही. पण नेहमीप्रमाणे त्याचंही क्रेडीट ओरबाडून घेण्यासाठी पंपंनी जराही वेळ दडवला नाहीये. असो. पण त्यांची मांडणी अशी की, भाव वाढले तर ते 'त्यांनी' वाढवले आणि भाव कमी झाले तर ते 'मी' कमी केले. यामूळे भक्तांना भक्तीसाठी अजून एक आरती कंपोज करण्यासाठी खोटा विषय मिळाला. चालू देत भजनं.